Вахара наькъаш...

25.04.2018

Вахара наькъаш...

Март бетта 30 дийнахьа » Беке къонгаш» аьнна афиша яр Назранерча Культура ц1ен хьалхашка хьалтеха йоаллаш. Г1алг1ай меттал из йолга хайча безам хилар са цунга хьажа яха. Дешара се чукхаьчача сай наьнагара дийхар аз цунга хьажа яха сайна цо пурам далар. Са дехара раьза а хинна, «г1о», аьнна жоп делар сона нанас. Укх дунен т1а со в1алла хьакхолла дагахилале хьалхарча хана г1алг1ай вахар мишта хиннад ха безам бар са. Шоатта дийнахьа, сайранна 4 сахьат даьлча, Культура ц1ен юхе кхоачаш аз зийр мел дукха машенаш яр цига, гаьннара хьажача а гуш дар из. Бакъда, сона моттацар уж беррига нах спектакле баьхкаб аьнна. Сои са нанеи кассе билеташ эца аьнна д1ат1адахача зале моттигаш яц аьлар тхога. Цкъарчоа ч1оаг1а дика хийттар тхона из, сел дукха нах г1алг1ай меттала йолча спектакле бахкара. Бакъда тхоаш ца хьожаш диссар хьог1 аьнна кхера а делар. Цхьа ха яьккхар оаха латташ, моттигаш яцар. Х1аьта а юхадийрза чу дахка маганзар, хьажа безам ч1оаг1а хиларах. Тхона б1арахьежаш лаьттача цхьан кхалсаго аьлар: «Хьадале , со хьожаргъя шоана зале моттиг йий, мича хов билеташ ийцараш хьа а ца боаг1аш бисса бий а». Моттигаш кора йир, ч1оаг1а раьза а долаш, цунна баркал а аьнна, 1охайшар тхо. Зале ч1оаг1а сатийна яр, гуш дар деррига адам лаьрх1а хьажа уйла йолаш долга. Спектакль д1айолаелар. «Беке къонгаш» яха роман дийша яцар со, сона дага а дацар хьалхарча заман чухьа г1алг1ашта юкъе , х1анз, тахан латтача заман вахара белгалонаш хинна хурга я аьнна. Къел ювцаш йолаелар спектакль. Ма дагадацар сона сайга ена согато сайна сцена т1а актераш гойтарг ма йий аьнна. Ший дезал хьаьнала рузкъаца къахьегаш кхебеш воалла Беке наьха карах вер сайна дайча, сай да, ишта бехк боацаш тийшача белха вийна ди хьалхашка дера сона. Юстара а латташ сай вахарага се хьежаш санна хийттар сона. Ма къиза, ма миска йиссар Беке фусама-нана шший кхаь бераца, биъ пен юкъе. Пхе бераца ишта йисар тха нана а, яьннача ханах а шоайла тара хийттар сона уж шиъ. Цу заман шийга ена согато кхалсаго мишта т1аийцар ейча, сона хайр сай нана г1алг1ай къаман йизза йо1 йолга а, цар санна денал долга. Д1ахо цун бераш кхувш доаг1аш се а, сай йижарий а, сай воша а дага латтар сона. «Масса заман согатонаш цхьатарра хиннай-кх» аьнна уйла ессар сона, тийшаболх а, миска нах а хиннаб. Ц1аьхха со д1а-хьа хьежача белхаш баг1а кхалнах зийр аз зале, со хьайийрзача са нана а яг1ар б1аргех 1оуха хиш д1адоахаш. Спектакль чакхъяьлар. Нах раьза а болаш т1оараш детта болабелар, залера свет хьалсегар. Дукха бар б1арг лоацаш бийлхалга гуш бола кхалнах. Дукха ха д1аяхай, зама хувцаеннай, бакъда тийшаболх, сага вахар наьха карах хадар, цхьаь буса кхалнах, дай боаца дуса бой. Сагото, из деррига таханарча денга кхаьчад. Цу балех ц1енаденнадац г1алг1ай къам тахан. 

Милаграс Базиева № 50 (11986), ера, 5 апрель, 2018 шу, четверг, 5 апреля 2018 год... 

Источник: http://serdalo.ru


Возврат к списку



 

График работы театра:
Администрация: 09:00 -17:00. 
Творческий состав:11:00-17:00.